《初生BB鍾意嘔奶搶Fo?》青協創新科學中心

2018-10-09

(圖:青協創新科學中心)

 

喺兩星期前,小明肚入面嘅小公主終於出嚟同大家見面喇,大家都對於家庭入面多咗一位新成員表示興奮。

 

雖然小明仲坐緊月,但妹妹小葵已經按捺不住,唔等家姐執返個樣,就衝咗上去家姐屋企度探BB。

 

一上到去,小葵發現小公主嘅睡房已經被佈置得極度fancy,勁多cute cute公仔同埋粉紅色嘢。喺咁嘅情況下,小葵又點可以唔抱起小公主同身後面嘅fancy 嘢一齊集下郵呢?一抱上手,小葵不禁大讚小公主夠哂乖巧,任影唔嬲之餘,仲唔喊唔嘈。不過影影下,小公主突然對住鏡頭嘔奶,然後露出呆滯嘅萌樣。完全無上過育兒課嘅小葵嚇咗一嚇,喺唔知咩事嘅情況下,只好呼喚家姐過嚟睇下佢做咩事。

 

小葵:「佢做咩無啦啦會嘔嘅?唔通佢咁醒已經識sense 到個鏡頭喺邊,想做D嘢出嚟搶我Fo?定係因為我抱住佢不停自轉影相所以佢頭暈呀?一定係見頭暈所以想嘔喇佢!」

 

小明無奈地回應:「你又喺度無限聯想,都叫咗你平時認真D上堂架啦!其實係因為頭先喺你上嚟之前,陪月姨姨餵咗佢飲奶咋。」

 

小葵:「即係佢食得飽得滯,好似我地平時咁飽到嘔呀?」

 

小明邊解釋邊接過BB:「頭先陪月姨姨餵佢食咗好少份量架咋,所以應該唔關事囉!其實初生BB嘔奶係好普遍嘅,主要原因係BB個胃同食道之間嘅賁門括約肌(esophageal sphincter)未完全發育完成。喺正常情況下,當大人吞咗食物落個胃之後,賁門括約肌會緊閉以確保食物向下移動。而BB嘅賁門括約肌雖然同樣係會關閉,但佢未必可以做到完全緊閉,所以當BB嘅胃部收縮時,產生出嚟嘅壓力有機會令到賁門括約肌打開,令到飲咗落去未消化嘅奶倒流返入食道,出現嘔奶呢個情況。」

 

小葵:「原來係咁,真係唔生過都唔會知道D咁嘅嘢。但係家姐,你而家係咁拍BB係唔係想佢嘔清哂,好似人地肚痾要痾清哂咁呀?」

 

小明繼續解釋:「我呢D叫掃風,其實頭先食完奶我都有做架,不過可能我呢D新手媽媽學藝未精啦!掃風其實係想喺拍打嘅過程令BB打嗝,排走啜奶時一併吸入嘅空氣,就可以減低胃部嘅壓力,從而減低嘔奶嘅機會。」

小葵:「其實嘔奶咪由得佢嘔囉!嘔完就應該冇事架啦!」

 

小明沒好氣地繼續解釋:「但係如果BB喺瞓覺時嘔奶,嘔出嚟嘅奶水有機會流入耳仔、鼻同埋氣管而導致窒息架!所以係唔可以由佢囉!」

 

小葵:「原來咁大鑊架?咁家姐你呢D新手真係要跟陪月姨姨好好學習下點掃風喇。你頭先應該叫陪月姨姨幫你搞掂埋先放工嘛!」

 

小明反住白眼回應:「……. 鬼唔知咩,陪月姨姨今日有事趕住走嘛!我已經好努力學緊架喇!你唔好刺激我喇,唔係我好易會有產後抑鬱架!」

 

資料來源:
http://www.kidspot.com.au/

 

想知更多科學資訊?

請登入青協創新科學中心

如要留言,請先按此登入

如未是家長全動網會員,可以按此免費登記

新增留言